‘A luce e’ Napule.

Quanne se fa scuro

‘a luce e’ Napule te resta ‘mpietto.

Tu t”a puorte dinto pure quanne chiove

te salva ‘o luccichio d’ ‘e lampare

luntano luntano miezo ‘o mare…

Po’ si tu vuo’ sta luce

a truove dinto a ll’uocchie d’ ‘e criature

ca te nquietano

scennenne pe’ viche e vicarielle

ma tu e’ perduone pecché so’

comme a tante friccicose fiammelle.

De notte, quanne nun ce sta cchiu’ nisciuno,

a luce argiento….

quanne schiove t’ ‘a porta ‘a Luna.

No Napule nun è cartulina

è nzeriusa dispettosa e bambina

e comme a tutte e’ criature millenarie

te sape raccuntà e’ storie cchiu’ varie.

No nun purtà na lanterna pe vedè

si a tiene mpietto sta luce sta dinto a te.

Anema nera.

Scenne pe’ ‘e viche

pe’ strade e chiazze,

passa pe’ miezo ‘a gente

l’anema nera e’ sta città.

Quase è nu ciummo e’ dulore

senza spazio p”ammore

c’affoga e’ gole

e nun fa respirà.

Però dinto a ll’uocchie d’e criature

ognettanto

s’appiccia nu bagliore

na’ traccia e’ culore

tale e quale ‘o sole

che bagna ‘o mare

quanne e’ stutà ‘ a luce s’è fatta l’ora.