Comm’i’ fosse nu pittore.

Stu pensiero e’ te è nu culore,

na smania d’arte,

comm’i’ fosse nu pittore.

L’incarnato d”a faccia

se va furmanno traccia a traccia

e chillu ciuffo ribelle

è nu suscio ‘e viento ‘ncoppe a li stelle,

li stelle so’ l’uocchie tuoje belle.

Po’ accummencia a pittà

e parte ‘a linea d”e cosce,

so’ longhe, nervose, fujarelle

e te veco comme tu fosse na’ gazzella.

Vene, po’ flessuoso ‘o cuorpo d’ammore,

ca nun m’abbastano sti mmane e’ culore,

Nce vulesse nu caleidoscopio d’universo,

ma mentre ca cerco stu strumento,

l’immagine more e i’ me sento perso.